Plot twist гэдэг үгийг эх хэл рүүгээ яг юу гэж орчуулахыг мэдэхгүй юм. Үйл явдлын эргэлт гэх үү, гэнэтийн эргэлт гэх үү. Мэдээж тухайн салбарын хүмүүс нь оновчтой орчуулах байх. Ерөнхийд нь тайлбарлавал, plot twist гэдэг нь тухайн зохиол, жүжиг, кино зэргийн үйл явдлыг санаанд оромгүй, төсөөлөөгүйгээр өөрчлөхийг хэлнэ гэхэд буруудахгүй. Жишээлбэл, за энэ кино нэг иймэрхүү л төгсөх юм шиг байна гээд таамаглачихсан байж байтал тэс өөрөөр дуусахыг хэлэх юм.

Эхлэхийнхээ өмнө энэхүү нийтлэлд киноны талаар хэт дэлгэрэнгүй бичсэн тул киногоо үзэж амжаагүй, үзэхээр төлөвлөж буй хүмүүсийг уншихгүй байхыг зөвлөе. Өөрөөр хэлбэл, спойлер агуулсан болохоор тэр. Гэхдээ миний хувьд спойлердуулах тусмаа үзмээр санагддаг төрлийн хүн. Тийм хүн байвал хамаагүй ээ, унш унш.

Улс төр сонирхдог болохоор ч тэр үү Game of Thrones цуврал надад маш их таалагддаг юм. Эгзэгтэй мөчид хэнтэй нэгдвэл тэрхүү улс төрийн хямралыг хохирол багатай давах вэ, улс төрд хэт шударга байснаар яадаг вэ, улс орныг авч яваа эрхмүүд наанаа сайхан харагдавч цаанаа ямар хуйвалдаанд оролцож, сандал суудлаа авч үлддэг вэ гээд киноны үйл явдал нь бодит байдал дахь улс төрийн үйл ажиллагаатай нэлээн төстэй санагддаг.

Ингээд та бүхэндээ Game of Thrones цувралаас миний хувьд топ гэж нэрлэдэг гурван plot twist-ийг танилцуулъя.

Эддард Старкийн үхэл

Үнэнч шударга, өргөсөн тангарагтаа үнэнч тэрээр кино бүр дээр байдаг “манай талын хүн”. Магадгүй Game of Thrones сонирхогчдын хамгийн дуртай дүрүүдийн нэг байх. Гэхдээ тэрээр цувралын нэгдүгээр улирлын төгсгөлд цаазлуулан нас бардаг нь киноны хувь заяаг ихээхэн өөрчилдөг билээ. Яалт ч үгүй мартагдашгүй plot twist. Түүнийг яг цаазлуулах мөчид үзэгчдийн сэтгэлд “Хэн нэгэн ирж аврах ёстой”, “Тэр үхэх ёсгүй шүү дээ”, “Гол дүр юм чинь юу гэж үхэх юм бэ” хэмээх дуу цангинана. Түүний толгойг цавчих мөчид энэ магадгүй хэн нэгний, ялангуяа Жоффрейгийн төсөөлөл байх ёстой гээд итгэж чаддаггүй. Гэхдээ л тэр үхсэн үнэн байдаг билээ.

Улаан хурим

Залуусыг red flag, green flag гэж хуваадаг шиг цувралын green flag-ууд бол яалт ч үгүй Старк овгийнхон билээ. Гэвч Улаан хурим бол Старкуудыг дэмжигчдийн зүрхэнд гуниг хуруулсан plot twist. Дайны үеэр Робб Старк язгууртан бус бүсгүй болох Талисатай гэрлэдэг. Үзэгчдийн хувьд Game of Thrones-ийн ертөнцөд хэн ч хайр сэтгэлээрээ гэрлэдэггүй гэдгийг мэднэ. Түүнийг Талисатай гэрлэх үед байдал нэг л биш болж байгааг үзэгчид мэдэрдэг. Гэхдээ тэднийг арай ч тийм хэрцгийгээр үхнэ гэж төсөөлдөггүй. Руз Болтон Робб Старкийг хутгалах тэр мөчид үзэгчид Рикард Карстарк үнэн хэлж байсныг ойлгох болно.

…Робб Старк: Бид дайнд ялна гэж бодож байна уу?

Рикард Карстарк: Би бодлоо хэлчих үү, эрхэм дээдэс ээ?

Робб Старк: Та бодлоо хэлээгүй гэж үү?

Рикард Карстарк: Та түүнтэй гэрлэсэн өдрөө дайнд ялагдсан гэж бодож байна…

Ганц л гэрлэлт түүнийг дайнд ялагдуулсан. Гайхалтай plot twist тийм үү?

Жон Снөү бол Таргариен

Цувралын төгсгөлд Жон Снөү бол зургадугаар Аэгон Таргариен болох нь илэрдэг. Тэрээр Рейгар Таргариен, Лианна Старк хоёрын дундаас төрсөн. Лианна Старк Робертын бослогын үеэр төрөхийн хүндрэлээр нас барахынхаа өмнө өөрийн дүү Эддард Старкаас хүүгээ хамгаалахыг хүссэн. Гэвч Таргариен удмын хүүхдийг авч үлдэх нь Робертоос урвасан хэрэг болох байсан тул өөрийнхөө бутач хүүхэд хэмээн авардаг. Эддард Старкийг Хааны хот руу явахын өмнө Жон Снөү түүнээс миний ээж ямар хүн байсан бэ гэж асуухад Эддард Старк дараагийн удаа уулзахдаа хэлье гэдэг. Харамсалтай нь тэр хоёр дахин уулзаж чаддаггүй. Тэр үед Эддард Старк үнэнийг хэлсэн бол үйл явдал хэрхэн өрнөх байсан бол гэх бодол ч төрж байсан шүү.

Миний хувьд Game of Thrones цувралын топ гурван plot twist энэ гурав байлаа. Та санал нийлж байна уу?